27.08.2020 స్వేచ్చా సమర్పణలు

 

 

తొల్లి గురువు జగతి లోన తల్లి గాదె,

తొల్లి వేల్పుకున్ పార్వతి తల్లి గాదె,

తల్లి కన్నదైవము లేదు నెల్లరకును

భూతినిడుశుభొదయ మెనె పూసపాటి

 

తెలుగు సుధల నైవేద్యము   

సలలితమాయే సతతము శారదకృపతో    

తొలకరి భావమనోహర 

కలికి పదమ్ములవి జిల్కు కమనీయంబై !! 

 కస్తూరి శివశంకర్

********************* 

 

శక్తి దాయిని వేనీవు శరణు మాత

కరము లోనశుకము మాకు కలుగు శుభము

మధుర మీనాక్షిగా మాకు మాట నేర్పి

కవన పటిమను వాగ్ధాటి కలుగ జేసి

తెలుగు తేనియల్ ఛాత్రుల వెలుగునిమ్ము..

 జైకర్ విశ్వేశ్వర్ టోణ్ పె, థానే, ముంబయి, మహారాష్ట్ర

 **************************************************************

 

సేకరణ వెంకట్. సిహెచ్

 భళారే... తెలుగు!

 ఒకప్పుడు ప్రముఖ పాత్రికేయులు శ్రీ భండారు శ్రీనివాసరావుగారు ఫేస్‌బుక్‌లో ఆసక్తికరమైన ఈ క్రింది ఆంగ్ల వాక్యాన్ని పోస్ట్ చేశారు:

 An Amazing Sentence in English

Remarkable indeed! The person who made this sentence must be a GENIUS in English vocabulary.

 "I do not know where family doctors acquired illegibly perplexing handwriting; nevertheless, extraordinary pharmaceutical intellectuality, counterbalancing indecipherability transcendentalizes intercommunication's incomprehensibleness.''

 ఈ వాక్యంలో ఇరవై పదాలున్నాయి. ఒకటవ పదంలో ఒక అక్షరం, రెండవ పదంలో రెండు అక్షరాలు, మూడవ పదంలో మూడు అక్షరాలు, ఈ విధంగా అక్షరవృద్ధిక్రమంలో ఇరవయ్యవ పదంలో ఇరవై అక్షరాలు ఉన్నాయి.

 ఇదొక అపురూపమైన చిత్ర రచన. దీనికి ప్రతిగా తెలుగు భాషకు గల శక్తిని వెల్లడిస్తూ ఏల్చూరి మురళీధరరావు గారు ఈ క్రింది వాక్యాన్ని ప్రకటించారు:  

 “ఏ మంచి కవైనా విశ్వనాథ గ్రంథావళిని చదవకపోతే కవిత్వరచనలో పద్యనిర్మాణశక్తికి, సద్గుణాలంకారవ్యక్తికి,

రసోచితశబ్దార్థయుక్తికి, సుమకోమలభావభావనకు, నవ్యసంప్రదాయపదగుంఫనకు, భవ్యరసాస్వాదరసాయనవాణికి, పురుషార్థోచితచిత్తవృత్తిచిత్రణకు, భారతీయతామరందాస్వాదలోలుపతకు, అతిలోకచమత్కృతిమత్కృతిమత్ప్రతీతికి, విషయచింతానిరోధనిశ్చలసమాధ్యవస్థకు, విపంచీస్వరసౌభాగ్యబంధురశయ్యావైయాత్యానికి, ఉత్కృష్టలోకసిద్ధార్థమహాపురుషగుణకీర్తనకు, రమణీయార్థనిర్మితశ్రవణమనోహరకావ్యలక్ష్మికి, నానార్థస్ఫోటవాచకత్వసంయోగాదినియమితవ్యంజనకు, అభిధావివక్షితాన్యపరవాచ్యసంలక్ష్యక్రమభావధ్వనికి, శృంగారవీరకరుణహాస్యరౌద్రాద్భుతశాంతాదిరసప్రతీతికి, గిరిశిఖరపతన్నిరర్గళస్రవంతీనిరుపమానధారాశుద్ధికి, ధర్మజ్ఞానభక్తిప్రేమసత్యాద్యుత్తమాదర్శప్రతిపాద్యవస్తుస్వీకృతికి, సహృదయహృదయవాసనాపరీపాకభావనాప్రపంచశోభాదూరవర్తే!

 పై వాక్యంలో 26  అక్షరవృద్ధి దళాలున్నాయి. మొదటి దళం ఒక అక్షరం, రెండవ దళం రెండక్షరాలు, మూడవ దళం మూడక్షరాలు....

ఇలా ఇరవై ఆరవ దళం ఇరవై ఆరు అక్షరాలతో అక్షరవృద్ధిక్రమంలో కూర్పబడి ఉన్నాయి.

 1. ఏ

2. మంచి

3. కవైనా

4. విశ్వనాథ

5. గ్రంథావళిని

6. చదవకపోతే

7. కవిత్వరచనలో

8. పద్యనిర్మాణశక్తికి,

9. సద్గుణాలంకారవ్యక్తికి,

10. రసోచితశబ్దార్థయుక్తికి,

11. సుమకోమలభావభావనకు,

12. నవ్యసంప్రదాయపదగుంఫనకు,

13. భవ్యరసాస్వాదరసాయనవాణికి,

14. పురుషార్థోచితచిత్తవృత్తిచిత్రణకు,

15. భారతీయతామరందాస్వాదలోలుపతకు,

16. అతిలోకచమత్కృతిమత్కృతిమత్ప్రతీతికి,

17. విషయచింతానిరోధనిశ్చలసమాధ్యవస్థకు,

18. విపంచీస్వరసౌభాగ్యబంధురశయ్యావైయాత్యానికి,

19. ఉత్కృష్టలోకసిద్ధార్థమహాపురుషగుణకీర్తనకు,

20. రమణీయార్థనిర్మితశ్రవణమనోహరకావ్యలక్ష్మికి,

21. నానార్థస్ఫోటవాచకత్వసంయోగాదినియమితవ్యంజనకు,

22. అభిధావివక్షితాన్యపరవాచ్యసంలక్ష్యక్రమభావధ్వనికి,

23. శృంగారవీరకరుణహాస్యరౌద్రాద్భుతశాంతాదిరసప్రతీతికి,

24. గిరిశిఖరపతన్నిరర్గళస్రవంతీనిరుపమానధారాశుద్ధికి,

25. ధర్మజ్ఞానభక్తిప్రేమసత్యాద్యుత్తమాదర్శప్రతిపాద్యవస్తుస్వీకృతికి,

26. సహృదయహృదయవాసనాపరీపాకభావనాప్రపంచశోభాదూరవర్తే! 

 

తెలుగు భాషాభిమానుల ఆసక్తి కారణంగా ఈ వాక్యం అచిరకాలంలోనే ఫేస్ బుక్ లోనూ, అంతర్జాలంలోనూ, వాట్సాప్ మాధ్యమం ద్వారానూ, వివిధ పత్రికలలోనూ పాతికవేలకు పైగా పర్యాయాలు సంచరిస్తుండటం విశేషం!

 భళారే ... తెలుగు!

 ***********************

గురువుల ప్రాశస్త్యం

చంపకమాల

 

గురువులె విశ్వమందునను గోడులు దీర్చెడి జ్ఞానసంపదల్

వరముగ నిచ్చిబ్రోవగను వారధియై వెలుగొందు జీవకోటికిన్

హరిహర సృష్టికర్తగను ఆశయసిద్దినొసంగు మోదమున్

స్థిరమును గూర్చు డెందమున తీరము జేర్చును నమ్మి గొల్వుమా!

 

మహేశ్ ముత్యాల

********************* 

షిర్డీ సాయి ఇష్ట పది

 

అతడొక  సాధువు

మహిమ లెన్నో తనవద్ద కలవు

 

వృత్తి యాచక వృత్తి

ప్రవుత్తి జనులకు జ్ఞానబోధ

 

కులము దేవుని కులము,

మతమ్మది మానవత్వము

 

తల్లి పుడమి తల్లి

తండ్రి అనంతాకాశము

 

చెరుకుపల్లి గాంగేయ శాస్త్రి, రాజమండ్రి

 ***********************************************

నివాసము షిరిడీ గ్రామము

విలాసము పురాతన మసీదు ప్రాంగణం.

సంతానము సకల

భక్త జన సందోహము.

రూపము చిద్రూపము,

తేజము ప్రచండ భాను తేజము.

నేత్రములగ్నిహోత్రమ్ము

గాత్రము సుస్వర సమ్మిళితము.

 

గాంగేయ శాస్త్రి, రాజమండ్రి,

 *********************************

 

శార్ధూలము

 సద్యోజాతము మీ స్వరూప హరువుల్ స్వామిన్ ! సదా సేవలో  

వైద్యావైభవమందు మేటి గరిమల్ వైశిష్ట్యముల్ నేర్పుతో       

హృద్యంబౌ భవదీయమానసములో వేవేల కైమోడ్పులే

విద్యావేణిని వాణినిన్ గొలుచుచూ "వేదాంత వేద్యుండవై"

 

మానవ సేవలో స్వ, పర బేధాలు లేకుండా సేవానిరతిలో నిత్యం తరియించె వారందరికీ పద్యం సమర్పణ

 

శార్ధూలము

 

రక్షింపన్ స్వ-పరంబులేని తలపారాధించగా మానవుల్ 

పక్షంబెన్నక బంధమెన్నక సదా పాలించుచూ ధర్మముల్;     

సాక్షీభూతములెన్ని సంఘమున విశ్వాసంబుగా నిల్చినన్       

మొక్షామార్గములాయె సేవనిరతుల్ మోదంబుగా ధారుణిన్

కస్తూరి శివశంకర్

 ********************

 

కంప్యూటర్ ప్రేమలేఖ

 డియర్ సాఫ్ట్ వేర్ రాణి

 

ఎంతకాలమైంది నిన్ను చూసి, విండోస్ ఓపెన్ చేస్తే చూద్దామని మెసేజి ఇస్తే  విండోస్ 98 ఓపెన్ చేశానని  రిప్లై .  LAWN లొ కొస్తే  చూద్దామంటే LAN లో ఉన్నానంటావు.    386 లాంటి నిన్ను 486కు   ఎలాగోలా      మార్చగలిగా.  లేటెస్ట్ VERSION కు  UPGRADE చేద్దామంటే   మీ డాడీ BUG చేశాడు.    MS DOS 98 VERSION లో   ఉంటే ఎలా?  WINDOWS  10 లోకి  UPDATE కావాలి   కాని.  నీ నుంచి  KB లొ రెస్పాన్స్ వస్తోంది .  MB     స్పీడులో ఉండాలి .  నీ VGA లాంటి చూపులు SVGA  కావాలి డియర్.  నీ నవ్వు EXE ఫైల్  లా ఉండాలి.  నీ   లేత  పెదవుల నుంచి వచ్చే మాటలు నాకు తప్ప ఎవరికి అర్ధం కాకుండా ENCRIPTION కావాలి. నీవు పంపే    కిస్సులు HIDDEN FILE లో దాస్తా.  నీ  పిలుపు కోసం  నా స్వీట్ హార్ట్ INSERT MODE  లోనే ఉంచా.  నీ నాజూకు  చేయితో      వ్రాసిన లవ్ లెటర్స్ BACKUP చేశా. నీ అభిప్రాయాలు LASER PRINTER లా ఉండాలి గాని DOT MATRIX లా వలదు సుమీ.  మరీ NIBBLE లా మాట్లాడకుండా BYTE లా మాట్లాడవా బేబి.   నీ హార్ట్ DISC ను మీ డాడీ PARTITION చేసినా ACTIVE PARTITION నాకే కేటాయించవా ప్లీజ్.  మీ డాడీ మన ప్రోగ్రామ్ ను HAWKING చేయకుండా గంటకో సారి నీ PASSWORD మార్చడం మరచి పోవద్దు. ASSEMBLED SYSTEM కన్నా BRANDED SYSTEM లాంటి వాడు కావాలంటాడు నాకు కాబోయే మామగారు. నాలో CATCHE MEMORY ఎక్కువ. మీ డాడీ మైండ్ PROCESSOR కు కావాలిసిన DATA ఇస్తానని చెప్పు.  ప్రియా మన మాటలు , నీ పాటలు EPROM CHIP లొ భద్రపరిచా. నా మామ ఎన్ని సార్లు FORMAT చేసినా అవి ERASE కావని చెప్పు.  నీ లవ్ CURSOR నా హార్ట్ పైనే కలకాలం ఉంచుతావని అనుకొంటున్నాను..  అందుకే GIGO లా సరిపడిన FEED BACK ఇస్తావని ఆశిస్తూ  . . .

 

నీ HARD DISC

 

పూసపాటి

**************

అల్పజీవులెల్ల ఉపకారము జేయ

ధరణిజను కనుగొనె దశరధ పుత్రుడు

భక్తి పారవశ్యము తోడ ఉడుత లెల్ల జేరి

సేతు నిర్మాణ క్రతువు లో తోడ్పడె భువిన

సాయమొసగు మనంబు పొదిగిన జీవి ఏదైనా

ధన్యజీవి కదా ఈ ధర్మ ధరణి లొ

వక్రబుద్ధిని మర్మముగ మనంబున పొదిగి

తోడ్పడుచుందురు త్వరితముగ దుష్ట జనులు

జర జాగురూకత లేనియెడల ఇట్టి జనుల పట్ల

ఉపకారముతో అపకారము మెండు అవనిలో

వి.వి.శ్రీనివాస్

*****************

తరువోజ                           

స్వార్థ చింతన తోడ సాయపడకనె

    సాగించెడి బ్రతుకు చపలత్వము గద!

వ్యర్థ జీవితమందు వ్యామోహితుడిగ

    వాంఛలు నెరపగ యాతన కలుగు.

వర్థిల్లు తుండెనె ప్రాణులు సాయ

    పడుతు తమకు తాము వైభవమ్ముగను;

స్పర్థనొదలి నీవు సాయపడంగ

     సంఘటిల్లునె సర్వ సంబరాలన్ని!

 

మధురాక్కర

 నలుగురికి సాయపడి నీవు

       నందన మివ్వవోయి!

వెలుగు పంచవోయి! సతము

       వేదన దీర్చునోయి!

కలుగునోయి! ఘనము నీకు

       కౌటిల్య మాపి సాగ

మెలుగవోయి! హితముతోడ

       మేలు చేకూరునోయి!

 

వెంకట్. సిహెచ్

******************* 

 "తరువోజ" సొగసు కైతలసోంపు తెలిపి

       తారాడు పద్యసుధలభంగి నెఱిఁగి                 

వరముల పదములు వాంఛలు కలిగి

           వర్షించు తేనెల పరవశములిక   

సురుచిర మంజులంబులు నేడు చెలగు

        సుమసుందరంబగు శోభలు జిల్కు

 నిరుపమ రీతిగా నీహారికముల

     నెలవంకలును; నిగ్గునీలవేణులని       

 

కస్తూరి శివశంకర్

*********************

సేకరణ-   మోక్షం

 

ఒకప్పుడు మహాస్వామి వారి దగ్గరికి విదేశాలనుంచి ఒక వనిత వచ్చింది. గడపకి అవతల ఆవిడ కూర్చుంది. లోపల మహాస్వామి అభిషేకం చేసి వున్నారు. ఆవిడ బయటినుంచి ఒక ప్రశ్న వేసింది. పునర్జన్మ వున్నది, దానికి కారణము చేసిన పాపపుణ్యములు కారణము అంటారు కదా సనాతనధర్మంలో! నిరూపించడానికి ఏదైనా ఆధారం వున్నదా? అని అడిగింది. ఆయనేమీ మాట్లాడలేదు. ఒక అరగంట అయిపోయింది. ఆవిడ అలాగే నుంచుంది ఏమైనా చెప్తారేమో నని. ఆయన ప్రక్కన వున్న అంతేవాసిని పిలిచి అన్నారు “ఈసందు చివరలో ఒక ప్రసూతి వైద్యశాల వుంది. ఈవిడని ఇవాళ మధ్యాహ్నం వెళ్ళమనండి. ఆ వైద్యశాలలో ఎన్ని గదులున్నాయి? ఏ ఏ గదిలో ఎవరు ప్రసవం కోసం వున్నారు? ఏ గదిలో వున్నవాళ్ళు ఏంచేసున్న వాళ్ళు? మరునాటి వుదయంలోపల వాళ్ళకి మగపిల్లవాడు పుట్టాడా? ఆడపిల్ల పుట్టిందా? ఆ పిల్ల/పిల్లవాడు పుట్టినప్పుడు వాళ్ళెలా భావిస్తున్నారు. ఇవి వ్రాసుకొని నాదగ్గరికి రమ్మనండి జవాబు చెప్తాను” అన్నారు. ఆవిడ మరునాడు వచ్చి ఏమీ అడగలేదు.

 

మహాస్వామి వారికి కొంత దూరంలో నేలమీద పడి నమస్కారం చేసి “నాకర్థమైంది, పునర్జన్మ సిద్ధాంతం ఎంత సత్యమైనదో నాకు తెలిసిపోయింది. ఇక మీరు జవాబు చెప్పక్కరలేదు.” అన్నది. ఎలా? ఆవిడ అక్కడికి వెళ్ళి చూసింది. పది గదులున్నాయి. 8 గదులు మామూలువి. 2 గదులు ఏసి. మళ్ళీ ఈ ఎనిమిది గదులలో నాలుగు స్పెషల్ రూమ్స్. నాలుగు మామూలువి. ఆవిడ మరునాటి ఉదయం వరకు పుట్టినటువంటి పిల్లలు, వాళ్ళ తల్లిదండ్రుల స్థితి సేకరించింది. ఒకరు జిల్లాకి అధికారి. ఏసి రూములో ఆయన భార్యకి మొట్టమొదటి సంతానం కొడుకు పుట్టాడు. కొన్ని వందలమంది వచ్చి జిల్లా అధికారికి చేతిలో పుష్పగుచ్ఛాలు పెట్టి పళ్ళు పెట్టి అయ్యా మీకు కంగ్రాచ్యులేషన్స్ అండీ మీకు కొడుకు పుట్టాడు అంటున్నారు.

 

ఇంకొకరికి సామాన్యమైన గదిలో ప్రసవమైనది, శస్త్రచికిత్స చేయవలసి వచ్చింది. వెయ్యి రూపాయలనుకున్నది పదివేలయింది. భర్త చూడడానికి రాలేదు ఎందుకంటే బిల్లు కట్టడానికి కావలసిన డబ్బు అప్పు చేసుకోవడానికి తిరుగుతున్నాడు. ఆయనకీ కొడుకే పుట్టాడు. ఇంకొక ఆవిడకి ప్రసవానికి వేళయిపోయింది. ఆవిడ గది కూడా తీసుకోలేదు. వరండాలో బల్లమీద పడుకోబెట్టి పురుడు పోశారు. నాలుగిళ్ళల్లో పనిచేసుకొనేటటువంటి వ్యక్తి. పుట్టడానికి ముందే ఎక్కడ పుట్టడానికి అనువుగా వుంటుందో ఎంత భోగకరమైన ప్రదేశంలో పుట్టవచ్చో ముందే నిర్ణయమైపోయిందా? అంటే వాడు ఎంత భోగమనుభవించాలి అని నిర్ణయింపబడితే కదూ వాడికి తెలియకపోయినా వాడికి పిల్లవాడిగా వచ్చాడు.

 

గతజన్మలో చేసుకున్నది లేకుండా ఇలా ఎలా పుట్టారు? అక్కడే పుట్టేటట్లు చేసినవాడు ఒకడున్నాడు. అలా చేసేటప్పుడు వాడి పుణ్యాన్ని దృష్టిలో పెట్టుకొని అక్కడ పుట్టించాడు. వాడి పాపాన్ని దృష్టిలో పెట్టుకొని ఇంకొక ఫలితాన్ని కూడా ఇస్తాడు. అందుకే ఆవిడ ఇక మాట్లాడలేదు. నాకు అర్థమైపోయింది ప్రసూతి కేంద్రానికి వెళితే పునర్జన్మ సిద్ధాంతం ఎంత గొప్పదో అని. కాబట్టి పునర్జన్మ సిద్ధాంతం ప్రాణం.

 

మోక్షం కలడానికి భక్తితో అంటే ధార్మికమైనటువంటి జీవనాన్ని గడపగా గడపగా అనువైన సమయం చూసి పరమేశ్వరుడు యే కోరికా లేకుండా భక్తితో బ్రతుకుతున్నాడు గనుక చిత్తశుద్ధినిస్తాడు. ఆ చిత్తశుద్ధికి పాత్రత అంటారు. నా దగ్గర ఆవుపాలు గోరువెచ్చటివి వున్నాయి. పాలు త్రాగడానికి మీరు ఒక గిన్నె పట్టారు. అది అపరిశుభ్రంగా వుంది. అటువంటి పాత్రలో నేను పాలు పోస్తానా? పాలు విరిగిపోతాయి. వేరేది తెచ్చుకోండి అందులో పోస్తాను అంటారు. పాత్రత లేకుండా జ్ఞానమివ్వరు. పాత్రత కలగాలంటే చేసిన పుణ్యానికి ఫలితాన్ని అడగకూడదు. నేనొక పుణ్యం చేసి ఫలితం కావాలంటే సుఖం క్రింద ఇచ్చేస్తాడు.

 

అయిపోయిందిఆ పుణ్యం అక్కడితో పోయింది. ఒక పుణ్యం చేసి నాకేఫలితం అక్కరలేదు. సర్వం శ్రీ ఉమామహేశ్వర పరబ్రహ్మార్పణమస్తు – ఈశ్వరుడికే ధారపోశాను. పాపం అనుభవించేశాను. అనుభవించడానికి ఇప్పుడు పుణ్యం వుందా? లేదు. అనుభవించడానికి పాపం వుందా? లేదు. ఒకవేళ పాపం వున్నా చిత్తశుద్ధిని ఇస్తాడు. అది పాత్రత అంటారు. అందులో జ్ఞానధార కటాక్షిస్తాడు. జ్ఞానధార పోయగానే సంచితం తగలపడిపోతుంది. ఇక అనుభవించడానికి పాపంలేదు, పుణ్యం లేదు. పాపమూ, పుణ్యమూ లేని వాడికి ఇక శరీరమెందుకు? వాడు ఈశ్వరుడి యందు ఐక్యమైపోతాడు. అదే మోక్షం. 

****************************************************