24-12-2020 గురువారం ప్రణాళిక
ఇప్పటి వరకు సమూహంలో జరిగిన / జరుగుతున్న చర్చను దృష్టిలో ఉంచుకొని తెలుగు తేనీయలు మీకు పద్య / కవన/ రచన, తెలుగు సాహితీ పిపాస పెంపొందుటకు ఎలా ఉపయోగ పడుతుందో పద్యం లేదా కవిత రూపంలో తెలియజేయగలరు.
శ్రీ గురుభ్యోనమః
అందరికీ నమస్సులు
తెలుగు తేనీయల సమూహము గురించి ఎంత చెప్పినా తక్కువే. అందునా స్వోత్కర్ష అవుతుందేమోనని చిన్న సందేహం(నేనూ సభ్యురాలిని కదా) తో నా భావనలు వెల్లడి చేస్తున్నాను.
అక్షరముల మాలలు తప్ప యన్యమెఱుఁగఁ
పదములల్లుట యేకాని పద్యమల్ల
పటిమ లేదు,వ్యాకరణపు బాట విడిచి
వత్సరములు గడిచెనని వగపు మిగిలె
చెలిమి విరియగ నిచ్చోట చేరినాను
పద్యమల్లగ గురువుల ప్రాపు దొరికె
తీయ తేనియల్ గ్రోలుచు తియ్యనైన
పద్య రసధారల నలరు భాగ్య మబ్బె
అనుదినమునొక పాఠము యనువు తోడ
నేర్పు శారదాలయమిది, నెమ్మి తోడ
యనుజులక్కల చొప్పడు నమర సీమ
వెతల మరిచి మేధను సాన బెట్టు హనువు
తేట గీతుల విని మది తేలిపోవు
యాట వెలదుల సయ్యాట నాట విడుపు
వృత్తముల చదువగ పరివృతము నొందె
సీస పద్యములు విరిసి బాస నేర్పె
మంజరీ ద్విపదలు కడు మంజులములు
యెంత యోనేర్చినామన్న సుంత మిగులు
సతము తీయతేనియలూరు స్థావరమ్ము
స్నేహ భావనలు కురిసి చెలువు పెంచె
పద్య సంవాదములె కాని వాదులాట
లేక నవ్వుల పువ్వుల లేత వెలుగు
పఱచ యెదలు పొంగగ నేను పాదుకొంటి
అవళూరు సీత
వచనం,
సాయానికి జాతి భేదం లేదు,
ఆపదలో ఎవరున్నా ఆదుకునే,
నైజం కొందరికుంటుంది, అది,
అందరికీ ఉంటే ఇక కావాల్సిందేముంది...
గాంగేయ శాస్త్రి, రాజమండ్రి
దొరుకును
సవినయంబుగా ,సవ్యంబుగా ,శ్రద్ధగా
నిర్మలంగా ,నిజాయతీగా, నమ్మకంగా
తమ కర్తవ్య నిర్వాహణను
నిర్విఘ్నంగా నిర్వర్తించు
వారికి ఎటువంటి సహాయమైనను
ఆప్తులు, ఆత్మీయులు,
అపరిచితులనుండి
అవసరమైనంత వరకు దొరకున్
తలంచినన్ ,ఆశించినన్
జి మురళీ మోహన్ రావు
చంపకమాల
చెలిమి నితాంతమైన, మదిసీమన పద్యములే మనోజ్ఞమై
చెలిమి సుదీప్తభావము సుచేతనమై కురిపించు మోదముల్
చెలిమి పటీరముల్ జిలుకు చిక్కని చక్కని నందనమ్ములై
చెలువపు భావమై తెలుగుజిల్గులు పల్కులు పారిజాతమై !
చెలిమి = స్నేహం, నితాంతము = అధికము, గొప్పగా
సుదీప్తభావము = అందమైన వెలుగు పంచే లక్షణము
సుచేతనము = చక్కని తెలివితేటలు, విజ్ఞానం
పటీరము = మంచి గంధము
నందనము = ఇంద్రుని ఉద్యానవనం (మన పద్యాలు అలాంటి సౌరభాలు అందిస్తాయి కదా )
చెలువము = అందమైన, మనోజ్ఞమైన
చంపకమాల
తెలుగు పదంబు దివ్యమగు తేనెల వానలు జాలువార్చగన్
తెలుగు పదంబు భవ్యము ! మదీయసుధాఝరులందు వన్నెలై
లలిత సుమాళి కౌముదులు లాహిరులై "భవకల్పవృక్షమై"
చెలిమి మనోజ్ఞకమ్రసిత శీకరమై "మధురోహ" భాగ్యమై
పలుకుల పల్లవంబులకు వన్నెలు చిన్నెలు కూర్చినట్లుగన్ !
శా ll
సాహిత్యాభినివేశముల్ గరిమతో సంప్రీతి చిత్తంబుతో
స్నేహామోదము దెల్పి మంగళములౌ "చిద్రూపరూపంబులై
సౌహార్ధమ్ములతో వరాలచయముల్; స్వాధీనమౌ విద్యలై
నీహారంబులు పంచు మేటి రచనల్ నిక్కంబుగా కొల్చుచున్ !
కం ll
అక్షయమగు స్నేహములివి
లక్షణమౌ సాహితీకలాపము సిరులై !
వీక్షణములు లాస్యములై !
సాక్షాత్కారమగు కవనసౌహార్ధములై !
కం ll
చరవాణీ సంఘములో
పరవశముల్ పంచుకొంటి ! పల్కుల విరులన్
కురిపించే భాగ్యములై
వరమై వాణీ కృపాబ్ధి వాంఛింపగనే
కం ll
ఈ హేమంతపు భావము
సౌహార్ధములై సతతము చందనమయమై !
స్నేహాలంబిత సూత్రము
మోహనమయమై నిరతము మురళీరవమై !
కస్తూరి శివశంకర్
వచన కవిత
పదమాలికలను పద్యములుగానల్లు
పటిమనుబెంచి పరిపక్వతనేర్పె
తెలుగు తేజపు తేనియలుపంచి
తెలుగుమాధుర్యమును తేటతెల్లబరచె
సాహిత్యాభిలాషను పెంచి
సత్కవుల సాన్నిహిత్యాన్నిపంచి
సాదరాభిమానమును జూపు
సన్నిహితుల సమూహమిది
భేషజాలు విడచిమేషమంటిమనసులకు
మత్తేభ బాసటను మాకునందించె
మేషమంటి మనసులు = సున్నితమైనమనసులకు,
త్వరగా విషయం గ్రహించలేని వారికి అని నా భావన.
హేమలత
మేలు గూర్చు మిత్రులుండిన చాలు
ఘన విజయములు సాధించగలము
దన్ను నిలిచి శ్రీకృష్ణుడు అండ నుండ
కురుక్షేత్ర రణంబు గెలిచె నర్జునుండు
త్యాగధనుల తోడుపాటునయ్యె గాంధీ
స్వాతంత్ర యుద్ధమునన్ విజయుండు.
CA కె మల్లికార్జునరావు
దత్త పదులతోడయు మాకు దైర్యమిచ్చి
కవన భూమిగ సాగును ఖచ్చితముగ
వచన కవితలు వ్రాయించి వత్సలముగ
ప్రతిదినముప్రణాళికలిచ్చు ప్రజ్ఞమీర
తప్పు రాసిన భావముల్తమ్ములుగను
సున్నితముగమా కుతెలిపి సూచకులుగ
స్పూర్తి నింపియు వ్రాయించు సూచనిచ్చి
మత్త గజముతొండమువలె మన్నికగను
పూర్వ కవులను మరువక పుస్తకములు
నంద జేసి స మీక్షలు ననవరతము
భద్ర పరచుచు రచనలు బ్లాగులందు
అహరహము శ్రమించియు చిన్న యాశ లేక
ఆత్మ బంధువులుగ మేము అవనియందు
పెద్ధ లాశీస్సు లందిచు పేర్మి తోడ
తెలుగు తేనియలందున తేజరిల్లె
గీతాశైలజ
తెలుగు తేనియల సాహితీ పటిమ తెలుపుతూ, సభ్యుల సాన్నిహిత్యం గురించి తెలుపు చిరు ప్రయత్నంగా సీస మాలిక
సీ.
తెలుగు సాహిత్యమే దివ్వెగ వెలిగెడు దివ్య సమూహమై, తేనియ లను
సార్థక నామము సంస్కరించుకొని మనోరమ మిచ్చెడి నుగ్గు యిదియె!
అభిజాతుల కవిత లబ్బురముగ మది మురిపించి వెన్నెల ఝరుల హొయలు
జూపించెడి వితతి శోభలివియె! సద్విమర్శలవి సతము మైత్రి సుధలు
బంచి సద్గుణ హితవచనము లందించు క్షేత్రమై, నిత్యము శ్రేష్టమైన
కృత్యములిచ్చుచు యెసగ విద్యలొసంగు సన్నిహితుల స్నేహ సంగమమిదె!
విజ్ఞాన గనులన్ని వెలయించి తెట్టులో నిమిడినో! భారతీ నివ్వెరపడు
సాహితీ చందన వాహిని జాల్వారి నిచ్చలపు నదియై నివ్వటిల్లు.
గీ.
సాహితీ వేత్తల గరిమ సంజనించు
తెలుగు తేనియల సమూహ దీప్తు లివియె!
అహరహము జ్ఞాన సంపద నద్భుతముగ
కూర్చు సౌహార్ద్య మిచ్చెడి కూటమిదియె!
వెంకట్.సి హెచ్
కావ్య-కథా సుధల మధుర రుచి తెలిసె
తెలుగభాషయన్న మెండుగ ప్రీతి పెరిగె
మాననీయుల, కవుల పరిచయం కలిగె
నిండుకుండ వంటి వెన్న మనుషులె కలిసె
నాకన్ని వచ్చునన్న గర్వమణిగె
తోబుట్టువుల ప్రేమ వాత్సల్యమందె
తెలుగు తేనెలు సేవించ మనసు తీపిచెందె
అక్షరామృత పానమున ఆయుస్సుపెరిగె
విష్ణుప్రియ
తే.గీ.మా
మది మధురోహల సంద్ర నారముల కె/
రటములుప్పొంగగా జేసి రయమున చెయి/
లేఖన కుపక్రమింపగ రేబగళ్ళు/
మరచి తెలుగుతేనెల రుచి మరగ యమ్మ/
వొడిగ మారె నాకీకడ. బుద్ధిధాత్రి/
కరుణ గల్గ మేషమునకు గరి చెలిమి దొ/
రికిన భంగి నన్నిచటాదరించి రంత
వారణాశి శ్రీలేఖ
తెలుగు తేనియల మైత్రీబంధం
పనుల వత్తిడిలో లేటుగా యింటికి రావడము జరిగినది..కావున ఆలస్యమైనది..మన్నించగలరు...
తెలుగు తేనియలు గురించి ఎంత వ్రాసినా తక్కువే అనిపిస్తుంది. నేను 26.11.2020 తేదీన మన గ్రూపులో సభ్యుడుగా చేరినట్టు గుర్తు....ఒక నెల క్రితం శ్రీ వేంకట్ గారి సౌజన్యంతో రావడం జరిగింది...అందరూ ఎంతో ఉత్సాహంగా,అన్యోన్యంగా, ఐకమత్యంగా,ఉన్నతంగా కలసిమెలసి ఉంటున్నందుకు అందరికీ పేరుపేరునా ధన్యవాదాలు,కృతజ్ఞతలు చెబుతూ...యిలాగే ఉంటారని మనసా, వాచా, కర్మేణా నమ్ముతూ......చిన్ని పద్యాలు...
ఉత్పలమాల.
ఎక్కడి తేనియల్ సుధలు, నెక్కడి నెయ్యపు బంధముల్గనన్
ఎక్కడి సూచనల్, చెలిమి, నెప్పుడు లేదిట భేద భావముల్
వాక్కయె పారిజాతవిరి, పద్య పరంపర కావ్యరీతులన్
గ్రక్కున జుంటి తేనియలు గ్రమ్మున గ్రోలగ పొట్టనిండగన్
తేటగీతి..
యెక్క డెక్కడ పెరిగినా యిక్కడొచ్చి
మరచి పోవక మదిలోనె మమతలుంచు
గురు శిష్యుల మైత్రియు గూర్మితోడ
ఆడ పడుచులు ఆత్మీయు లగుదురిచట..
ఆటవెలది.
నిన్న మొన్న జేరి నియమాలు పాటింప
సాగు చుండె బండి సవ్యముగను
తప్పు తడికలన్ని 'దాదా'లు దిద్దంగ
తప్పు దిద్దుకుంటు తరలుచుంటి....
పి.ఎల్.నాగేశ్వరరావు
సీసము
ఏనాటి పుణ్యమో యీనాడు లభియించె తెలుగు తేనియలందు తీపిరుచులు
దినము దినమున కధికమగు ధీశక్తి పంచియిచ్చెడిమిత్ర పటలి యమరె
రసరాజ భావార్థ రాజిత కవితల మాధురీ భరితమౌ మధువు దొరికె
తెలుగు భాషకు తేనియ లొలికించు రసరమ్యకావ్యాల రవళి మోగె
తే.గీ.
పద్య కవితల దీప్తులు పరిఢవిల్ల
నిత్య నూతన ప్రయోగ నియతి గలిగి
అభ్యుదయ కవులకు నిండు హస్తమొసగి
నిలుచుగావుత నీకీర్తి నిత్యముగను
ఆదిభట్ల సత్యనారాయణ
సీసము
మత్తేభమును పోలు మత్తేభములు గల తెలుగు తేనియలను తెగువ మీర
వివరింప దగుటయే వింత సాహసమిల ఏనుగున్ వర్ణించు ఎలుక రీతి
మెకము వంటి జనుల మెరుగులు దిద్దుచు పద్యము, కవనము హృద్యము గను
లిఖియించు ప్రౌఢిమ సఖితముగా నేర్పి తెలుగు సాహిత్యము తేజరిల్ల సందేహములు దీర్చి సంతోషములు పంచి సందడి జేసెడి సంహృతమది
ఆట వెలది:
రాజరికము లేదు రాజులు లేరులే
భాష విలువ దెలియు బాదుషాలు
మహిని జేరిరిచట మత్తేభ, శార్దూల
ములను నేర్పి పద్య మురువు బెంచ
జైకర్ విశ్వేశ్వర్ టోణ్ పె, థానే, ముంబయి
కామెంట్‌లు లేవు:
కామెంట్‌ను పోస్ట్ చేయండి