చిత్రానికి పద్యం
- 75
29-12-2020 మంగళవారం
పై చిత్రానికి
పద్యాలు/కవనములు
అందించగలరు...
తేటగీతి
అబల యనుమాట యికజెల్లు సబల యామె
జాతి జాగృతి జేసెడి నేత యామె!
మ్రగ్గు నిస్సహాయపు స్త్రీల మార్గదర్శి
విర్రవీగు పురుషుల కన్నెర్ర యామె!!
డా. నాగులపల్లి
తే.మా.
ఇంతి నేర్వలేని జదువు నిలనుగలదె/
యన్న చందాన, ముందంజ యన్నిటన్ ధి/
షణము జూపగ వేయగ శక్తిరూపు/
లై, యదను కాదిపుడు భామలకిలు దాట/
మన్న యన్నిరంగముల తామడుగిడవలె
వారణాశి శ్రీలేఖ
తే
ముదిత నడుపగ స్ప్లెండరు ముదముతోడ
చెలియ చెక్కర్లుగొట్టగ చేరెతోడు
మహిళ నేర్వని విద్దెలు మహిన గలవ!
శక్తి రూపిణి జగతికి సర్వమెరుగ
వాణిశ్రీ నైనాల
"ముదితల్ నేర్వగరాని విద్య కలదే?ముద్దార నేర్పించినన్" అన్నాడొక కవి
"లేచింది నిద్ర లేచింది మహిళాలోకం"అన్నాడు ఇంకొక కవి
సావిత్రి గెలిచెను ధర్మ వాదన నందు యమధర్మరాజును
మైత్రేయిలా పెక్కు విదుషీ మణులు వేదముల్వల్లించిరి
మొల్ల, వెంగమాంబ లలా కవయిత్రు లెందరో ఖ్యాతినార్జించిరి
ఝాన్సీ లక్ష్మి , రుద్రమ దేవాదులు కత్తి పట్టి కదనమున దూకిరి
అనాది మొదలు ఆధునికము వరకు అతి వలన్నిటా సత్తా చూపిరి
నేటి *ఆడాళ్లకు హోండా మోటార్ సైకిళ్ల పరుగు లొక లెఖ్ఖా?*
భద్రకం
బామ్మయే నడిపె వాహనం
అమ్మలే పడిరి అబ్బురం
దిమ్మలే తిరిగె ఆర్యుకున్
బొమ్మలే అయిరి చూపరుల్
CA కె మల్లికార్జునరావు
చూడండర్రా
అడగొద్దు ఆ వయసు సంగతి
చక్కని ఆరోగ్యంతో తొలగించుకోండి
చిరాకులు, అనవసర ఆలోచనలూ
సాగించండి హాయిగా ఆత్మ జ్ఞానంతో
ప్రశాంతంగా నిలకడగా
ఎంతదూరమైనా ఏ విధముగా నైనా !
జి మురళీ మోహన్ రావు
సీసము
యింటినుండి బయట కేగుటె రుంగని బామ్మగా రేరీతి బయటకేగె
బండిలో గూర్చుండ భయమందు మామ్మలు స్ప్లెండరు పైనెట్లు కూర్చునుండె
సైకిళ్ళు ద్రొక్కుట సైపని ముదుసలి మోటారు సైకిలే మోజు తోడ
నడుపుచున్నదినిపుణత్వ గరిమ మీర వెనుకచూపేలేని వీర వనిత
తేటగీతి
ముదిత లెరుగరె నేర్వగా ముదము తోడ
బతుకు బండిని లాగగా ప్రగతి మీర
అబల లనుటతప్పు సబల లైన వీరు
సాక్షులగుదురు యువతకు శక్తిఁ జూప
ఆదిభట్ల సత్యనారాయణ
ఆటవెలది
లక్ష్మి భాయి వంటి లక్షణ మున్నట్టి
వీరవనిత లున్న భరత భూమి
నాటి ధీర గుణము నగుపడె నేడును
వయసు నెంచకున్న వనిత లోన.
హేమలత
ఆట వెలది.
ముసలి వార మనుచు ముడుచుకు పోనేల?
ఆడు వారమంచు హడలి పోము
వంట యింటి లోన వంటలనే కాదు
నడుప గలము వాహనాలు మేము.
డి.రామ నాగేశ్వరరావు
ఆటవెలది..
బామ్మ గారు జోరు బండినెక్కెనుజూడు
చుక్కలన్ని జూపె లెక్కపెట్ట
తాను ఎవరికన్న తక్కువ కాదని
బామ్మ తాను కాదు భామ యనగ....
హీరొ హోండపైన హీరొయిన్ లను జూడు
హీరొ కూడ మహిని జీరొ యగును
వారి జోరు ముందు వాహన మేమిరా
బండి కాదు రైలు బండి నడిపె
జైకర్ విశ్వేశ్వర్ టోణ్ పె, థానే, ముంబయి
సీ.
ముదిమివయసునందు ముదితలిరువురు ద్విచక్ర వాహనమెక్కి సంతసముగ
రహదారి మార్గమున్ రయముగ న్వెడలెడు దృశ్యము జూడంగ, వశ్యపడని
దేది గల దతివ కెంతటి కార్యమై న సుగమమే యని నర్మగర్భ
ముగ విశదమగునె! ముదితనపు సొగసు రూపులైన కొమలు రూఢిపరచు
గీ.
నివ్విధ మెగుచుకొని నేటి యింతులంత
ప్రేరణము బొందగ సమత వెల్లివిరిసి
నవ సమాజ స్థాపన కూడి యవని వెలిగి
భవ్య రీతిగ విశ్వము పరిఢవిల్లు
వెంకట్.సి హెచ్
చీర కట్టిన ధీశా లులం మేము,
హీరోహోండాలు నడపగలం మేము.
శ్రమకు మారు పేరు మేము,
విలువకట్టలేని శ్రమనిస్తాం మేము.
ప్రాణికి జీవం పోస్తాము మేము,
ప్రాణికై జీవితాన్ని త్యజించగలం మేము.
వయసు బంధనంగా భావించం మేము,
శక్తి ఉన్నంతవరకు పోరాడుతూనే ఉంటాం మేము.
ఉష.
శా ll
"హీరోహొండ" విహారముల్ చెలువమై హేలావిలాసంబులై
నారీ స్థైర్యము, స్థేమముల్ భవములై నందంబులై, ధైర్యమున్
శూరత్వమ్మున లక్ష్యముల్ లవములై క్షోణీతలంబున్ సదా !!
నైరాశ్యమ్మది యావరించక మనోజ్ఞంబైన లాస్యంబులై"
కస్తూరి శివశంకర్
తేటగీతి..
అక్క చెల్లెళ్ల బంధము హాయి గొలుప
పట్న వాసము వెళ్ళిరి బైకు పైన
యింటి పనులన్ని సవరించి యింటి కేగ
ఊరు జనమంత ఎదురేగెనుత్సవముగ..
పి.ఎల్.నాగేశ్వరరావు
మ ll
*ముదితల్ నేర్వగరాని విద్య కలదే? ముద్దార నేర్పించినన్ ? *
ముదమున్, మోహనమైన భావనల సమ్మోహించు రూపంబులై
సదుపాయంబులు మృగ్యమై తలపులన్ స్థైర్యమ్ములే యోగమై
వదనంబున్ ధరహాసముల్ చెలువమై భామా కలాపంబులై !
కస్తూరి శివశంకర్
సీ.
తనువు,తరము మారె తానును మారెగా కనులు తెరచి చూడ
కలయె నిజము మనసు యవ్వన మైన మైత్రి భావంబు తో
పనులు చేయు రయము పద్ధతి గను ఈ నాగరిక జీవితేచ్ఛ
తీర్చుకొనగ మోటారు సైకిలే మోదమిచ్చు జానపదుల జీవ శైలి
జూప నిలను తాను నడుపు చుండె తరుణ రథము
తే. గీ.
వయసు నడ్డంకి కాదుగా వాంఛ యున్న
తమకు తామె సాటి యనుచు ధైర్య గమన
ముదిమి భామ్మ యలరె గదా!ముదిత భామ
కార్య శీలు రిట్లు కవన గౌరవముగ.
శిరీష.
తే. గీ.
బామ్మ తన బాట బంగారు బాట యనఁగఁ,
నక్కజముగ స్వారికి జవనాశ్వమనఁగఁ,
హీరొ హోండనెక్కి, సఖితో షైరు సేసి,
టీవిగ దిరుగాడుచు మగటిమిని జూపి,
వీరులనబడు పురుషులే "ఔర !" యనఁగఁ,
నొక్క తృటిన నేర్పరచెనో "యొరవడి"నట !
అట్టి కనులపండుగ గనినట్టి మేటి
యా చలనయంత్ర కంపెనీ యోచన యిది--
""హీరొయిను హోండ"" నెడు బ్రాండు హోరు లేపు,
విపణివీథిలో విడుదల సఫలమవగ !"
వట్టెం వెంకట రమణ
బయట జాబిలిని చూసి ... కలిగిన స్పందన
తే 1️
కలువదమ్ములలో లలి జెలిమి వేళ
పలకరించలేదోయి నా కలికి చిలక !
వికచ పంకజవనులు నబ్జినుల లేని
లలితసుమనమ్ర చంద్రికల కళ లేని
స్వర్ణ సౌధాన బ్రతుకంగ శాంతి లేదు
ఒక మంచి సేకరణ...
తెలుగు భాష ను మన ఇళ్ల లోనే వాడటం మానేశామా?*
డోర్ లాక్ చెయ్యకండి, నేను వెళ్తున్నా డోర్ లాక్చేస్కో’, ‘నా కార్ కీస్ ఎక్కడ ?
’ఇందులో ‘కీస్’ కు అచ్చ తెలుగు పదం వాడొచ్చు. కానీ మనం వాడం.
ఎందుకు ?
ఓ ఇరవై యేళ్ళు వెనక్కి వెళితే, తలుపు తాళం వేసుకో, గడియ పెట్టుకో
అనే వాళ్ళం. ఇవేకాదు, చిన్నతనంలో విన్న, వాడిన తెలుగు మాటలు మనమే మర్చిపోతున్నాం. నిన్న మొన్నటి వరకు మనం మాట్లాడిన మాటలు మన పిల్లల కు నేర్పించాల్సింది పోయి, మనమిలా ఎందుకు మారిపోయాం ?
మన తెలుగులో మాటలు లేవా ?
ఎందుకు లేవు, భేషుగ్గా ఉన్నాయి ! కానీ మనం పలకం.
🔸వంటింటిని......కిచెన్ చేసాం. వసారా.....వరండాగా మారింది.
ఇలా చావడి, పంౘ, ముంగిలి, నట్టిల్లు, తలవాకిలి, నడవ, పెరడు, ఇవన్నీ మరచిపోయాం.
🔸మన ఇళ్ళకు చుట్టాలు, బంధువులు రావడం మానేసారు. గెస్ట్‌ లే వస్తారు.
🔸ఆ వచ్చిన వాళ్ళు మనింట్లో అన్నం తినరు. ఏ లంచో, డిన్నరో చేస్తారు.
🔸భోజనానికి కూర్చున్నాక కంచాలు పెట్టటం మానేసి ప్లేట్లు పెడుతున్నాం.
🔸అందులో వడ్డించే వన్నీ.......రైస్, కర్రీ, గ్రేవీ, ఫ్రై వగైరాలే.
అన్నం, కూర, ఇగురు, పులుసు, వేపుడు, తినండి అంటే, ఇంకేమన్నా ఉందా, వాళ్ళేమనుకుంటారో అని భయం.
🔸అంగడి (కొట్టు) కి వెళ్ళేటప్పుడు సంచి తీసుకెళ్ళం. బ్యాగ్ పట్టుకుని షాప్‍ కు వెళ్తున్నాము.
🔸అందులో వెజిటబుల్స్, ఫ్రూట్స్ వేసుకుంటాము. కూరగాయలు, పళ్ళు కుళ్ళిపోయున్నాయి గదా మరి.
🔸ఏమండీ మీ మనవరాలికి కానుపు అయ్యిందా అని ఆ మధ్య ఓ పెద్దావిడను అడిగా. ఏంటమ్మా డెలివరీ అయిందా అనకుండా నువ్వింకా కానుపు అంటావేంటి ? అని ఎదురు ప్రశ్న వేసింది. బిత్తరపోవడం నావంతయింది.
🔸టీ.వీ లో వచ్చే ఆరోగ్య కార్యక్రమాలు, వంటా - వార్పు కార్యక్రమాలు రోజూ చూసే వాళ్ళ కు అలవోకగా ఆంగ్ల పదాలు పట్టుబడతాయి మరి.
అందుకే ఆవిడ అలా అని ఉండొచ్చు.
టీ.వీ వంటల కార్యక్రమం లో ఒకావిడ మనకు వంటకం ఎలా చెయ్యాలో చెబుతుంది.
అది ఏ భాషో మీరే చెప్పండి.
🔸‘కొంచెం సాల్ట్, మిర్చీపౌడర్, ధనియాపౌడర్, జింజర్ గార్లిక్ పేస్ట్ యాడ్‍చేసి ఫైవ్ మినిట్స్ కుక్ చెయ్యలి, స్టౌవ్ ఆఫ్‍ చేసి మసాలా పౌడర్ యాడ్ చేసి బాగా మిక్స్ చెయ్యాలి.’ ఇలాసాగుతుంది.
🍃మరి మన కూరల కు అల్లం, వెల్లుల్లి, ఉప్పూ, కారాల రుచులు ఎలా తగుల్తాయి?
🍃నిన్న మా పక్కింటాయన వచ్చి ‘మా సిస్టర్స్ సన్ ది మేరేజ్ ఉందండి, ఊరికి వెళ్తున్నాం, ఇల్లు కాస్త చూస్తుండండి’ అని చెప్పి వెళ్ళాడు.
మేనల్లుడి పెళ్ళి అనడంలో ఎంత దగ్గరితనం ఉంటుంది ? ఎందుకిలా ముచ్చటైన తెలుగు పదాల్ని వాడటానికి కూడ మనం వెనుకాడుతున్నాం ?
🍃అమ్మ, నాన్న అని పిలవడం ఎప్పుడో మానేసాం. అత్త, మామ, బాబాయ్, పిన్ని, పెద్దమ్మ, పెదనాన్న
అందరూ పోయి ఆంటీ అంకుల్ మిగిలారు. ఇప్పుడు అక్క, అన్నా, బావ, మరిది, వదిన, మరదలు వగైరాలంతా దూరమై కజిన్స్ అయిపోయారు.
🍃పిల్లల్ని బడికి పంపడం కూడ మానేసాం. స్కూల్‍ కు పంపిస్తాం. సరే బడికి వెళ్ళాక వాళ్ళకు ఎలాగూ ఇంగ్లీషు లో మాట్లాడక తప్పదు.
ఇంటి దగ్గరన్నా తెలుగు మాటలు మాట్లాడాలని అనుకోము.
మనం ఎందుకు నిన్నటి వరకు వాడిన తెలుగు మాటలను వదిలేస్తున్నాం ? ఎక్కువ ఇంగ్లీషు పదాలు వాడితే మనకు సమాజంలో గౌరవం లభిస్తుంది, అనుకుంటున్నామా ? తెలుగు మాటలు మనకు మొరటుగా ఎందుకనిపిస్తున్నాయి ? ఇది పరభాషా వ్యామోహం మాత్రమే కాదు, నాకూ ఇంగ్లీషు ముక్కలు వచ్చు, నేనేం తక్కువ కాదు అని మనకి మనం చెప్పుకోవడం, ఇతరులు అనుకోవాలన్న భావన.
ఇలా ఆలోచిస్తాం కాబట్టే మన తెలుగు భాషకు దిక్కులు లేకుండా పోయాయి. ఇప్పుడు మాత్రం పల్లెలు పట్టణాలు అనే తేడా లేకుండా అందరికీ ఇంగ్లీష్ మాటలు బాగా వంటపట్టాయి.
అలాగని వాడుకలో ఉన్నమాటలను వదిలేసి పరభాషా పదాలు వాడటం వల్ల భాష క్షీణించి పోతుంది. బయటకెళితే ఎలాగు తప్పదు అనుకున్నా, కనీసం ఇంటి గోడల నడుమైనా ఆపని చేద్దాం. అవసరం లేని ఆంగ్ల పదాలకు డోర్ లాక్ చేసి, అచ్చ తెలుగు మాటలకు తలుపులు తెరుద్దాం..
తెలుగు భాషను బ్రతికించు కోవాలంటే అందరమూ మన సంభాషణలలో అతి తక్కువ ఇంగ్లీషు వాడాలి
CA కె మల్లికార్జునరావు
కామెంట్‌లు లేవు:
కామెంట్‌ను పోస్ట్ చేయండి