శీర్షిక : చిత్రం పై
పద్యం - 60
ఈ చిత్రానికి తగిన రీతిలో
పద్య / వచన కవితలని అందించగలరు
గమనిక వచన కవితకు పాదములో 12 అక్షరములతో నాలుగు లేదా ఆరు పంక్తు
లుండవలెను.
తేటగీతి
మాన్యులైన వారలె బల్క మహిత వాక్కు
నుజ్జ్వలమ్మౌ భవిత కొరకొమ్మికగను
స్వాగతించవలయు నెప్డు సముచితముగ;
మాననీయుల మాటను మరువకెపుడు!
చల్లా దేవిక.
ద్వేషం
"ద్వి+విష"=ద్వేష.
అంటే రెండు విషములు.. లోకంలో విషము తిన్న వానిని మాత్రమే చంపుతుంది. ద్వేషం అలా కాదు, పెట్టినవాడు మరి తిన్న వాడు ఇద్దరూ చెడిపోతారు. అందువలన ద్వేషమును మనసు నుండి తరిమి వేయాలి . ప్రేమ ప్రవేశిస్తే ద్వేషం పారిపోతుంది.
CA కె మల్లికార్జునరావు
కందము
నీటిని దెచ్చుట కొరకని
పాటు బడెడి పల్లె వనిత బావిన దిగు నీ
బాటయె తీరుగ జేయక
నాటకములు జేయు ప్రభుత నైజము గనుమా!!
తేటగీతి
కొండ రాళ్ళను త్రవ్విర కొలను కొరకు
బండలాయెను బ్రతుకులు ఎండి పోయి
ఇంత లోతుకు దిగుటయు వింతగాదె
నీటి కష్టము దీర్చగ నిధులు లేవె
ఆటవెలది
నీటి కొరకు దిగెను నేటి మహిళ జూడు
పాటు బడుట నిటుల పాడిగాదు
బావి లోకి దిగిన ప్రాణంబు బోవురా
సాయమీయ రెవరు చక్కగాను
ఉత్పలమాల
మాటలు బల్కునే సదరు మంత్రులు నేతలు యోటుకోసమై
నీటికి బాధలన్ పడగ నెందరు వచ్చిరి సాయమీయగన్
పూటకు నెన్నిసార్లు నిల పుట్టెడు నీటిని తోడుకొందురే
వేటును వేయరే ప్రజలు బింకము వీడుచు నెల్లవేళలన్
చంపకమాల
తరుణులు కష్టమున్ బడగ దారిని జూపెడి వారలెందరో
తరలిరి బావి కోసమని దప్పిక నాపుట తప్పదే సదా
ధరణిన నీటికై నిటుల దారుణ బాధలు బొంద న్యాయమా
వరముల నీయగా నెవరు వత్తురు పాపము వీరికోసమై
ఉత్సుకము
బాటలు లేకను వీరికై
నీటిని పొందగ దూరమే
చోటును జూచుకు వత్తిరే
మాటును వేసిరి బావిలో
కళ్యాణ్ చక్రవర్తి ముంబాయి
నాడు దివినుండి భువిపైకి నడచి వచ్చె
గంగ, సగరుల మోక్షము గలుగ, నేడు
పాప జగము నుండిల పైకి పారె ధరణి
దాహమును దీర్చ. భాగీరధ జత నంబు
కన్న నింతుల కరణము కడిమి యేల?
వెంకటప్పయ్య సూరే
సగరుడు రయమున తెచ్చెను
సురగంగను దివినుండి భువికి
"వా" నరులు స్వార్థ చింతనతో
ఆ గంగను భువినుండి అంపిరి
పాతలమునకు, అయ్యో! ఎంత
కష్టము వచ్చెను ,అంగణామణులకు
పాతాళ గంగను ఇంటికి తోడ్కొని
పోవగా శివ...శివ...శంకరా.
బి.వి.శాస్త్రి
గూటి దాపులో నున్నట్టి ఏటి లోన
నీటి చెలమయే లేకుండె, మోటు బావి
తోటి దాహము బాపంగ బోటి లెల్ల
పాట పాడుచు మెల్లగా పోటి పడక
జోటి యొకతి ముంచ నదరి పాటు లేక
పాటవముగ వేరొక్క వధూటి నిచ్చె బిందె
గట్టు మీదున్న ని‌ంకొక కంబు కంఠి
వాటముగ పట్టి పైనున్న పల్లవోష్డి
చేతి కివ్వ ధరణి పైకి జేర్చె చెలిమి తోడ
కడవ లన్ని వడివడిగా కాంతలెల్ల
పట్టు జారిన పడతుల బ్రతుకు ముగియు,
పట్డ బోదు నీటి వెతలు పాలకులకు,
వంగి వంగి దండములును భంగ పడక
పెట్టి యింటి కొక కుళాయి వేగరముగ
యివ్వ గలవారమని తెల్పి దువ్వి దువ్వి
ఓట్లు గుంజుచున్ ,జనులకు తూట్లు పొడచు,
గెలిచి నంత పట్టణమున కులుకు చుండు,
పట్ట బోవు వారికెపుడు పల్లె పాట్లు
బీద జనులు సలుపునట్టి రోదనములు
పెద్ద వారి ముంగిళ్ళకు వెడలబోవు
పల్లె లన్ని భరత జాతి పట్ట కొమ్మ
లనుచు యెన్నికలప్పడు జనులు పలుకు
నోట్ల మరుగున ఘనముగా ఓట్లు పడగ
పల్లె ప్రగతిని కోరుచు పాటు బడగ
లేరు గా నేటి నేతలు, కోరుకొనుచు
ధూర్తులను గెలిపించగన్ దోచుకొనును
కొండ కోనలన్ విడువక కూర్మి తోడ,
భంగ పడిన నేమి జరుగు పడతు లార
నోట్ల కమ్ముడు బోయిన వోట్ల తీరు
నుండు నెపుడు నివ్విధముగా, గుండె
పగిలి యేడ్చినా తీరవు బాధ లెపుడు
కంట నీటితో నింపుము కడవలన్ని
పూసపాటి
కందం లో నా పూరణ ప్రయత్నం.
వీక్షణ కిది చోద్యంబే
రక్షణ లేనిదగు ఈ దొరవును దిగకుమీ
అక్షయ మగు జలముకొరకు
దీక్షగ తగు చర్యలు గొని దిద్దుము తప్పుల్
భద్రకము.
గుచ్చు వారికిది ఛోద్యమా
తెచ్చు వారికిలసాధ్యమా
రొచ్చుగా యనుట భావ్యమా
మెచ్చుగో గలుటసాధ్యమా
భద్రకము
వీరులా యనకు నారులే
బారులే ఇచట తీర్చుటా?
నీరుపై కియుబి కొచ్చెలా
వేరుదారిగని చూడుమా
సతీష్
సమంజసమా ?
నెప్పుడు నెడతెగక బారు నేరును అని సుమతీశతకం
వానలే వరదలై , జీవనదిలా మారిన వూరు అని పత్రికలు
గుక్కెడు నీరుదొరకక కష్టాలకడలితో తిరుగుచున్న వనితలెందరో
ఎవరే కష్టపడినను , అధికారులు ఆ నాలుగుగోడల మధ్యే సమావేశాలలో ఉండుటే సమంజసమా ?
చదివేస్తే ...
బడిలో పంతులమ్మలు చెప్పెదరు చదువులు
ఇంట్లో అమ్మలు చడివిం చెదరు , చేయించెదరు ,
అడిగెదరు ,అప్పచెప్పించు కొందురు.
పర్యావరణం,మంచినీటి నిరంతర సరఫరా ...
ఇలా ఎన్నో, ఎన్నెన్నో జీవితావసరాల గురించి
చదివినను ఎక్కడ వేసినగొంగళి
అక్కడే లాగా అమ్మల కష్టములు తగ్గించనిచో
మన మార్కులు , పతకముల ఉపయోగమేమి?
జి మురళీ మోహన్ రావు
ఆటవెలది
తాగునీటికొరకు తరుణులు బారుగ
దిగుడు బావి లోన దిగినవారు
దప్పి తీర్చు కొరకు తప్పవీ వెతలని
బిందె నీరు కొరకు భీతి మరచె
హేమలత
శార్దూలము 1️
ప్రాఘాతంబులతో విభాతములలో ప్రాణమ్ము దుర్జాతమై
వ్యాఘాతమ్ములు లేని తోయములనే వాంఛింప సంకల్పమే
మోఘమ్మొన్నని రక్షణా కొరవడిన్ ? మోదంబు జేకూర్చవా !
మేఘమ్మై ! జలమూర్తివై ! సుఖదమై ! మేల్గూర్చు రక్షింపగా
భావము
తెల్లవారుఝామునే మొదలయ్యే మా నీటి యుద్ధాల గురించి ఎలా చెప్పాలి ? ప్రాణాలు లెక్కచేయకుండా, ఎన్నో ప్రమాదాలని, నిత్యం కనిపించే విఘ్నాలని తొలగించుకుంటూ మా అందరికీ జీవనాధారమైన నీటిని అందుకోవాలనే సత్సంకల్పమే... మా రక్షణ లేదు, మా వేదన అర్ధం చేసుకునే నాధుడు లేడు
ఓ తండ్రీ ! వర్షధారల కురిపించి మా అందరికీ సుఖాన్ని, ఆనందాన్ని సంప్రాప్తించు
సీసము
వరుణుని శాపమా? వనితలు గుక్కెడు నీటికై పడెడి కన్నీటి వెతలు
నుయ్యియోమరియది గొయ్యియోపడతుల కిది కఠినపరీక్ష గద! శ్రమ పడి
గుండిక నీటికై కోమలాంగుల సాహసక్రీడయే ప్రాణ సంకటమ్ము
కాలు జారనతివ గంగలోన కలిసి శేషుని దర్శించి చితికి బోవు
తేటగీతి
దిగుడు బావి నీటి కొరకు దిగెడి స్త్రీల
దైన్యము కనక యొడలు బెదరునె త్రాగు
నీటి కష్టాలు తెలిపెడి నివ్వెర పడు
చిత్రమిది భారత ప్రజ విచిత్ర మిదియె
తేటగీతి
జలము నొడిసి బట్టి ప్రభుత జనుల కష్ట
ములను తీర్చెడి వాగ్దాన ములవి బూట
కము గద! ప్రకృతి వనరంగడి సరుకయె
బీద ప్రజల దాహము తీర్చు వేల్పు డెవరు?
వెంకట్.సి హెచ్
విశ్వకవి గీతాంజలి లో చెప్పిన వాక్యాలే...
మూర్ఖత్వము, ధూర్తత్వము ప్రబలి పోయి శుష్కజ్ఞానము మరింత బలమైనప్పుడు, స్వార్ధం మరింత ఎక్కువపోతుంది ఇదే భావం శార్ధూలములో
శార్ధూలము
శుష్కజ్ఞానము స్వార్ధపూరితమనస్సుల్ గల్గి సాంకేతికా /
విష్కారంబులు లేనిచో హృదయముల్ విజ్ఞాన సోపానముల్ /
శుష్కించెన్ కురిపించుమా కరుణనే సూచింపగా సర్వమున్ /
దుష్కార్యమ్ముల ద్వేషకార్యములతో ధూర్తత్వముల్ నిండగా /
కస్తూరి శివశంకర్
దృశ్యం - వచన కవిత
ఎంత కష్టం వచ్చే తరుణి మణులకు?
ఎంత సిగ్గుచేటు పురుష సింహాలకు?
నాలుగు బిందెల మంచి నీళ్ల కోసం,
తమ ప్రాణముల పణము పెట్టినారే,
స్త్రీల త్యాగాలకు లేదులే సవాలు,
మన మగ మహారథులు ఏమైరి?
నీటి కోసం బావి లోనైనా దిగలేదు.
ఒకనాడు భగీరథుడు సాహసించి,
కైలాసంబునకు కేగి శివుని ప్రార్థించి,
ధరణి కి రప్పించిన గంగా మాతను,
పాతాళమున కంపిన పాపమెవరిది?
జల క్షేమం చేసెదమన్న నాయకులు,
జల క్షామం చేసి మోసగించిరి కదా,
అకటా వనితల వెతలు తీరు టెలా?
CA కె మల్లికార్జునరావు
ఆటవెలది
ఒక్కమారె తపము నొనరించె నారాజు
భువికి గంగ దింప పూనుకొనుచు
బిందె నీటి కొరకు నిందు వదన లహో!
దినదినమ్ము తపమె దేవదేవ!
డి.రామ నాగేశ్వర రావు
సర్వే జనా సుజనా భవన్తు.
సాకి... సర్వే జనా సుజనాభవన్తు, సర్వే సుజనా సుఖినో భవంతు.
పల్లవి...
అందరూ బాగుండాలి, అందులో మనముండాలి,
ప్రతి ఉదయం శుభోదయం, ప్రతి రాత్రి శుభరాత్రి,
కావాలి అందరికీ అని కోరాలి అందరూ.....
చరణం 1.
మత్సరము, తామసము మనల విడిపోవాలి,
కుత్సితము, కుతంత్రము, మనం వదులుకోవాలి,
కోప తాపాలను అదుపులో ఉంచాలి, m
రాగ ద్వేషాలను పారద్రోలాలి మనం...
చరణం. 2
చీకటి దారులలో మణిదీపాలు వెలిగించి,
కూకటి వేళ్ళతో అవినీతిని పెకలించి,
అభివృద్ధి ఫలాలను అందరికీ అందించి,
సమతా మమతలను సరిపంచాలి మనం....
చెరుకుపల్లి గాంగేయ శాస్త్రి, రాజమండ్రి,
చరణం. 3
ధరణిలో వెలసిన భూగర్భ జల సంగ్రామం
మెట్ట ప్రాంత ప్రజల త్రాగునీటికై ఆరాటం
అడుగంటిన జలధి కొరకు పడతుల పోరాటం
మెట్టు యెఱుఁగని మెట్టప్రాంత దిగుడు బావిలో
దాహార్తికై ధరిత్రిలో ధరణీలు చేసే సాహసం
చరణం. 4
సమైఖ్యతతో సహనం జూపుతూ సాగే ఈ క్రమం
ఒకరికి ఒకరై ఐక్యత చాటుతూ జలధిని దరి చేర్చు క్రమం
సమైఖ్యతా సత్తాను చూపుతూ జలధిని ఒడిసే క్రమం
జలనిధి ఆవశ్యకతను భవితకు తెలిపే భవ్య చిత్రం
స్త్రినిధి చేసే సమైఖ్య జల పోరాటం జలధికై ఆరాటం
వి. వి. శ్రీనివాస్
సీసము
నీటి నొడిసి పట్ట నియతిజూపె పడతుల్ జేతులు కలుపగ చింతవిడిరి
దిగుడు బావిన్దిగు దీనుల వెతజూడ గుక్కెడు నీరైన దక్కగలద!
మండుటెండలనిట్లు గండములన్ దాటి చుక్కనీటిని జూడ మక్కువౌర!
యే భగీరథు డొచ్చు నీ గంగ నుబికించ తా తపోధనమును దారవోయ!
ధరణి నింకించి శోధించు ధవళకరుని చోటు దొరకనచటగూడ చేటు దెచ్చు
తేటగీతి
నీటి రుద నరికట్టగ నేటితరము
నవ్యరీతు లనుసరించి నాందిపలుక
జనులకందించ సుజలము జయముకలుగు
బాధ్యతెరిగి వర్తించిన బ్రతుకువిరియు
వాణిశ్రీ నైనాల
పడతులందరు చేరి పట్టుబట్టిరి కదా
పాతలగంగను పైకి చేర్చ ,పతిదేవులందరు
సిగ్గు పడునట్లుగా,వంతులవారిగా ,నీరు తోడి
గృహములందు నింప నిలుచుండినారు
అపర భగీరథులై ,ఆదిశక్తులై,అబలలు కారు
సబలులని గర్వించ ,నేటి సమాజమునిగ్గు తేల్చి.
బి.వి.శాస్త్రి
తేటగీతి
చేద తోడ నీరు దొరుకు చేద బావి
ఎగువ మెట్లు గలుగు నుయ్యి యెక్కు బావి
దిగుడు మెట్లు గలదిలను దిగుడు బావి
గిలక తిరుగుచు నీరిచ్చు గిలక బావి
ఎన్ని పేర్లున్న నేపేర నెఱుక దగిన
నీరు లేని బావి విలువ నీచ మేను
నీటి విలువ తెలుసుకొని నీటు గాడ
నీటిని పొదుపు సేయరో నెమ్మి తోడ
లేని యెడల నీకు మిగులు లేమి దనము
భావి భారత పౌరుడా భవిత బరువు
జైకర్ విశ్వేశ్వర్ టోణ్ పె, థానే, ముంబయి,
తేటగీతి
తాతల తరియింపగ నాడు తపము జేసి
దివిజ గంగను భువి పైకి దెచ్చె శివుని
కరుణ తోడ.స్వార్థమ్ముతో నరులు నేడు
గంగ నంపిరి పాపజగముల , జనుల
దుండగపు పనుల వెఱు గొందు నెల తాల్పు!
తరుణుల గచాట్లను చెరుపు తాపసుడిని
పంపి నీరమందీయుము ప్రమథ నాథ!
అవళూరు సీత
చిత్రానికి కవిత
మానవాళికి నీరే జీవనాధారం
గుక్కెడు నీటికై పడరాని పాట్లు పడుతూ పదామడలైనా నడిచిపోయే వైనం
ఉన్నవాడైనా లేనివాడైనా పంచభూతాలకు అధీనులే
పాంచభౌతికమైన శరీరంలో
ఏవొక్కటి లేకపోయినా నడవదు జీవం
ప్లాస్టిక్ బిందెల సప్తవర్ణాలతో అలరిస్తూ
దిగుడు బావిలో దిగులుగా ఎక్కడ
కాలుజారుతుందోనని దిగాలు పడుతూ దిగి
ఒకరికొకరు చేదోడంటూ కష్టాలలో కూడా కలిఉండే చక్కటి భావన
చేద తాడే ఆధారమవగా పాతాళంలో దాగిన గంగమ్మనైనా
పైకి తెస్తామంటూ పడతుల భగీరధ ప్రయత్నం
గీతాశైలజ
బారెడు మూరెడు చారెడు
కొలతలు చాలవు కొలిచేందుకు
తరచి పట్టేందుకు
మంచినీటిని తోడేందుకు
గొంతు తడుపుకునేందుకు
అగాధం లోన జలసిరి
అతివల పట్టుదల
నీటి యుద్ధ విన్యాసాల పరంపర
హరప్పా మొహంజదారో
నాటి నాగరికత లో వున్నామా లేక
అంగారక గ్రహ యాత్రా సన్నద్ధం లో వున్నామా !
కోవూరి
కడివెడు నీళ్లకై,
బడుగు పడతుల పాట్లు,
దిగుడు బావి మెట్లు,
తుదకు మిగులు కన్నీళ్లు....
గాంగేయ శాస్త్రి, రాజమండ్రి
ఉత్సుకము
ఒక్కరికొక్కరు తోడునై
గుక్కెడు నీటిని తోడగన్
చుక్కల శ్రామిక జీవితం
నిక్కపు వేదన శోధనే
అక్కిలి దాహపు నీటికై
అక్కడ యిక్కడ కూడికై
వెక్కస పాటును చేసెనే
అక్కటఁ !ఏమిటి? ఇవ్విధిన్
ఇక్కడి ఇంతుల బాధలే
తక్కిన వారికి పాఠమే
చక్కగ చుక్కను దాచగా
మిక్కుట మాయెను నీరమే
వెక్కస పాటులు ఉండునా?
గ్రక్కున గంగయు పొంగగా
ఇక్కలి బాధలు తీర్చగన్
అక్కలి వెల్లువ కల్లయా?
1.అక్కలి =అల , వెక్కసపాటు =దుస్సాహసం, 3.అక్కిలి =కలత
4.ఇక్కలి =ఈ +కలి,
శిరీష
నేడు చెయ్యాలి మనము పొదుపు నీరు
లేకున్నా మిగులును భవితకు కన్నీరు.
బి.వి.శాస్త్రి
తెలుగులో వంద ఉత్తమ పుస్తకాలు
●కన్యాశుల్కం - గురజాడ అప్పారావు
●మహాప్రస్థానం - శ్రీశ్రీ
●ఆంధ్ర మహాభారతం - కవిత్రయం
●మాలపిల్ల - ఉన్నవ లక్ష్మినారాయణ
●చివరకు మిగిలేది - బుచ్చిబాబు
●అసమర్థుని జీవయాత్ర - గోపీచంద్
●అమృతం కురిసిన రాత్రి - దేవరకొండ బాలగంగాధర తిలక్
●కాలాతీత వ్యక్తులు - డాక్టర్ శ్రీదేవి
●వేయి పడగలు - విశ్వనాథ సత్యనారాయణ
●కళాపూర్ణోదయం - పింగళి సూరన
●సాక్షి - పానుగంటి లక్ష్మీనారాయణ
●గబ్బిలం - గుఱ్ఱం జాషువా
●వసు చరిత్ర - భట్టుమూర్తి
●అతడు ఆమె - ఉప్పల లక్ష్మణరావు
●అనుభవాలూ..జ్ఞాపకాలు - శ్రీపాద సుబ్రమణ్యశాస్త్రి
●అముక్త మాల్యద – శ్రీకృష్ణదేవరాయులు
●చదువు - కొడవగంటి కుటుంబరావు
●ఎంకి పాటలు - నండూరి సుబ్బారావు
●కవిత్వ తత్వ విచారము - డాక్టర్ సిఆర్ రెడ్డి
●వేమన పద్యాలు – వేమన
●కృష్ణపక్షం – కృష్ణశాస్త్రి
●మట్టిమనిషి - వాసిరెడ్డి సీతాదేవి
●అల్పజీవి – రావిశాస్త్రి
●ఆంధ్రుల సాంఘిక చరిత్ర - సురవరం ప్రతాపరెడ్డి
●ఆంధ్ర మహాభాగవతం – పోతన
●బారిస్టరు పార్వతీశం - మెక్కుపాటి నరసింహశాస్త్రి
●మొల్ల రామాయణం – మొల్ల
●అన్నమాచార్య కీర్తనలు - అన్నమాచార్య
●హంపీ నుంచి హరప్పా దాకా - తిరుమల రామచంద్ర
●కాశీయాత్రా చరిత్ర - ఏనుగుల వీరాస్వామయ్య
●మైదానం – చలం
●వైతాళికులు – ముద్దుకృష్ణ
●ఫిడేలు రాగాల డజన్ – పఠాభి
●సౌందర నందము - పింగళి, కాటూరి
●విజయవిలాసం - చేమకూర వేంకటకవి
●కీలుబొమ్మలు - జివి కృష్ణారావు
●కొల్లాయి గడితేనేమి - మహీధర రామమోహనరావు
●మ్యూజింగ్స్ – చలం
●మనుచరిత్ర- అల్లసాని పెద్దన
●పాండురంగ మహత్యం - తెనాలి రామకృష్ణ
●ప్రజల మనిషి - వట్టికోట ఆళ్వార్ స్వామి
●పాండవోద్యోగ విజయములు - తిరుపతి వేంకటకవులు
●సమగ్ర ఆంధ్ర సాహిత్యం – ఆరుద్ర
●దిగంబర కవిత - దిగంబర కవులు
●ఇల్లాలి ముచ్చట్లు - పురాణం సుబ్రమణ్యశర్మ
●పానశాల - దువ్వూరి రామిరెడ్డి
●శివతాండవం - పుట్టపర్తి నారాయణాచార్యులు
●అంపశయ్య – నవీన్
●చిల్లర దేవుళ్లు - దాశరథి రంగాచార్య
●గణపతి - చిలకమర్తి లక్ష్మీనరసింహం
●జానకి విముక్తి – రంగనాయకమ్మ
●స్వీయ చరిత్ర – కందుకూరి
● మహోదయం - కెవి రమణారెడ్డి
●నారాయణరావు - అడవి బాపిరాజు
●విశ్వంభర – సినారె
●దాశరథి కవిత – దాశరథి
●కథాశిల్పం - వల్లంపాటి వెంకటసుబ్బయ్య
●నేను.. నా దేశం - దర్శి చెంచయ్య
●పెన్నేటి పాట - విద్వాన్ విశ్వం
●ప్రతాపరుద్రీయం - వేదం వెంకటరాయశాస్త్రి
●పారిజాతాపహరణం - నంది తిమ్మన
●పల్నాటి వీర చరిత్ర – శ్రీనాథుడు
●రాజశేఖర చరిత్ర – కందుకూరి
●రాధికా సాంత్వనము - ముద్దు పళని
● స్వప్న లిపి – అజంతా
●సారస్వత వివేచన - రాచమల్లు రామచంద్రారెడ్డి
●శృంగార నైషధం – శ్రీనాథుడు
●ఉత్తర రామాయణము - కంకంటి పాపరాజు
●విశ్వ దర్శనం - నండూరి రామమోహనరావు
●అను క్షణికం - వడ్డెర చండీదాస్
●ఆధునిక మహాభారతం - గుంటూరు శేషేంద్రశర్మ
●చంఘీజ్ ఖాన్ - తెన్నేటి సూరి
●చాటు పద్య మంజరి - వేటూరి ప్రభాకరశాస్త్రి
●చితి.. చింత - వేగుంట మోహనప్రసాద్
●గద్దర్ పాటలు – గద్దర్
●హాంగ్ మీ క్విక్ - బీనాదేవి
●ఇస్మాయిల్ కవిత – ఇస్మాయిల్
●కుమార సంభవం - నన్నే చోడుడు
●మైనా - శీలా వీర్రాజు
●మాభూమి - సుంకర, వాసిరెడ్డి
●మోహన వంశీ – లత
●రాముడుండాడు రాజ్యముండాది – కేశవరెడ్డి
●రంగనాథ రామాయణం - గోన బుద్దారెడ్డి
●సౌభద్రుని ప్రణయయాత్ర - నాయని సుబ్బారావు
●సూత పురాణం - త్రిపురనేని రామస్వామిచౌదరి
●సాహిత్యంలో దృక్పథాలు - ఆర్ఎస్ సుదర్శనం
●స్వేచ్ఛ – ఓల్గా
●కరుణశ్రీ - జంధ్యాల పాపయ్యశాస్త్రి
●వేమన - రాళ్లపల్లి అనంతకృష్ణశర్మ
●తృణకంకణం – రాయప్రోలు
●హృదయనేత్రి - మాలతీ చందూర్
●బ్రౌను నిఘంటువు - చార్లెస్ బ్రౌన్
●నీతి చంద్రిక - చిన్నయ సూరి
●తెలుగులో కవితా విప్లవాల స్వరూపం - వేల్చేరు నారాయణరావు
●నీలిమేఘాలు – ఓల్గా
●అడవి ఉప్పొంగిన రాత్రి – విమల
●చిక్కనవుతున్న పాట - జి లక్ష్మినరసయ్య, త్రిపురనేని శ్రీనివాస్
●కొయ్య గుర్రం – నగ్నముని
●నగరంలో వాన – కుందుర్తి
●శివారెడ్డి కవిత – శివారెడ్డి
సమాప్తం
కామెంట్‌లు లేవు:
కామెంట్‌ను పోస్ట్ చేయండి