చిత్ర కవనం 88, గురువారం, 11.02.2021

 

11.02.2021 గురువారం

చిత్ర కవనం 88

పై చిత్రానికి మనోహరమైన పద్య/ వచన కవితలను అందించగలరు.

 

కవులు/కవయిత్రులు తమ మనోఫలకము మీద తారాడెడు రమణీయ భావనలను వెలికి తీసి, సుమనోహర వన్నెయల నద్ది తేనియల దిటవు తెలిపెడి కవితలల్లి, సమూహాము తేజరిల్లు నట్లు ఘనత చేకూర్చగలరని విన్నపము.

 

 

తేటగీతి...

హృదిని  కదలించు దృశ్యము మదిని దోచె

నాడు విరిసిన మురిపెముల్  నేడు గనము

చితికిపోయిన బంధాలు గతిని మార్చె

మమత లుడిగిన మనిషిలో మనిషి మఱువు...

పి.ఎల్.నాగేశ్వరరావు

 

 

ఆ. వె.

మామ్మ చేతిలోన మమతానురాగాలు

యామె చేతి ముద్ద యమృతమదియె

మనిషికున్న వెతలు మాయమైపోవులే

తెలుసుకొనవె శైల మేఘమాల

జైకర్ విశ్వేశ్వర్ టోణ్ పె, థానే, ముంబయి

 

 

వచనం లో

అందరూ కలిసిన శుభ వేళ

అత్తనో, అమ్మనో కూర్చొని

చేతిలో ముద్దలు పెడుతుంటే

నాకు ఫస్టు, నాకు ఫస్టుఅంటూ

గమ్మత్తైన పోటీతో చేతులు జాపుతూ....

చింత కాయ పచ్చడి లోనూ అమృతం కనిపించే రోజులవి.....కాదా?ఆ మురిపాలు, ముచ్చటలు మిగిలాయి మనకు మధుర స్మృతులుగా.......

ఉష.

 

 

ఆటవెలది

అమ్మచేతిముద్ద యమృత సమంబగు

 ప్రేమతేరిc గూడి ప్రీతికరము!

 కష్టసుఖములెల్ల గలసి పంచుకొనుచు

 మెలగు రీతిc నేర్పి మేలుఁ  జేయు !!

డా. నాగులపల్లి

 

 

ముద్దల ముద్దుల తల్లి

కమ్మగా ,రుచిగా వండిన

దోసకాయ పప్పు బెండకాయ కూర

చింతకాయ పచ్చడి ముక్కల పులుసు

 

ప్రతిదీ విడిగా కలుపుతూ , సమయానికి

పిలుచు , రండర్రా అన్నానికని అమ్మ

 చెంగు చెంగున వచ్చిన మాకు

తన ఓపిక ,ప్రేమ అనురాగం ,కబుర్లు

ఆప్యాయతలను కలిపిన  ముద్ద ముద్దని

ముద్దు ముద్దుగా వరసగా తినిపిస్తుంటే

 అనిపిస్తుంది అడగందే అమ్మైనా

పెట్టదు  అనేది ఓ సామెతేనని

అడగకుండా పిల్లల కడుపు

నింపేదే అమ్మ అనీను  !

జి మురళి మోహన్ రావు

 

 

అమ్మ కడుపునుండి అవనిపైన అడుగిడిన మన అందరి తొలి పుట్టినిల్లు

అమ్మమ్మ గారి ఇల్లు ఉగ్గుపట్టి లాలపోసి ఊయలూపి అమ్మ ఒడిలో మనల్ని

ఉంచిన క్షణం నుండి అమ్మమ్మ తో మన అనుబంధం మొదలవుతుంది. 14 ఏళ్ళు నన్నొక యువరాణి లా చూసి అందమైన బాల్యాన్ని నాకు కానుక గా ఇచ్చిన మా అమ్మమ్మ అన్నపూర్ణ కి ప్రేమతో

 

తేటగీతి

అమ్మనే గన్న అమ్మమ్మ అమృత మూర్తి !!

చందమామని చూపుతూ సందెవేళ

గోరు ముద్దలు తినిపించు గోము గాను !!

కమ్మ నైన రుచులతోడ కడుపు నింపు

కొరినంతనే తీర్చును కోర్కెలన్ని !!

మమత లెరిగిన తల్లు లే మామ్మ లంత !!

రమ

 

 

ఆటవెలది

ఆత్మ తృప్తి గాను అమ్మమ్మ బెట్టేటి

చేతి ముద్దవలన చేరువయ్యి

అందరొక్కటిగను నారగింతు రచట

మమతపంచుకొనుచుమైమరతురు.

హేమలత

 

 

దృశ్యం పై కవిత-

అమ్మమ్మ చేతి ముద్ద మధురామృతం

అందు కలిసి యుండును ప్రేమ ఘ్రుతం

పిల్లల మనో దేహములకది గొప్ప బలం

ఆ ముద్దలు తినుట నిక్కముగ నదృష్టం.

CA కె మల్లికార్జునరావు

 

 

గోరు ముద్దలు తినిపించ గోము గాను

ప్రేమ చూపెడి యమ్మకు బెట్టు లేదు!

ఎన్ని వంటలు వండగ నెంత రుచిగ

చేత అమృత మిచ్చుగ, చెంత చేరి

 

 

తీపి జ్ఞాపకాలు

మమతను ముద్దగా చుట్టి

మనుమలకు తినిపించి

మురిసి పోవు బామ్మ కళ్ళలో మెరుపులు

వెన్నెల్లో అమ్మమ్మ చేతి వెన్న ముద్దలు

రెండు చేతులతో ముఖాన్ని తడిమి

దిష్టితీసి విరిచిన మెటికలు

అవధు లెరుగని అల్లరి తగవులు

ఆడిన గుజ్జన గూళ్ళు దొంగాపోలిసులు

తగిలిన గాయాలు దాచడానికి పడినపాట్లు

కాకెంగిలి జామకాయలు గోడలెక్కి కోసిన

దొంగమామిడి కాయలు తలుపు ఇరుకున

పగులగొట్టి పంపకాలు ఉప్పు కారాలతో ఊరిన నోళ్ళు

 

కొమ్మలెక్కి దూకిన కోతి కొమ్మచ్చిలు

జిగురుమట్టితో జిలుగు బొమ్మలు

నారింజ డిప్పలతో సున్నితపు త్రాసులు

ముంజుకాయలతో మోటారు కార్లు

పిల్ల కాలువల్లో వచ్చీరాని ఈతలు...

 

బిడ్డలతో పంచుకునే మరువలేని మధురస్మృతులు

మరుజన్మ వరకు మోయగలిగే భల్చక్కని భారాలు....

వాణిశ్రీ నైనాల

 

 

 

తే.గీ

భూజ ములపక్షు లనుజూపి బువ్వపెట్టు

బామ్మ  ప్రేమను గలిపియు బ్రతిమిలాడి

అమ్మ నాన్నముద్దలనుచు యాదరముగ

ఏక కంచము లోనను నెమ్మితోడ

 

మనుమ లమనుమ రాళ్ళను మమతతోడ

పేర్మి మీరగ జూచుచు పెన్నిధిగను

తీపి కబురులు జెప్పుచు తియ్యగాను

గోరు ముద్దలు తినిపించు గోముగాను

 

నాగరికత మోజుపెరిగె నరులకంత

వ్యష్టి కాపురములు వచ్చె వ్యవధి లేక

ఉమ్మడివ్యవస్ధయుబోయె ఉర్వియందు

బొమ్మ లందున జూచియు మురిసిపోయె

కాల మంతయు వచ్చెను ఖర్మగాలి

గీతాశైలజ

 

 

తేటగీతిల

అమృతమూర్తియై అమ్మమ్మ యాదరమున

పెట్టు చలిది యన్నము రుచి వివరణముల

మరువసాధ్యంబగునె చిన్న? మమతజిమ్మి

మధురిమలబంచి, యక్కున మక్కువగను

చేర్చి, నవ్వించి, కథలను చెప్పి, బ్రతుకు

సూక్తులను బోధచేయును చొక్కముగను.

అవళూరు సీత

కం||

అమ్మలు నొకపరి నిటులను

అమ్మమ్మలు నిట్టివిధము నాత్మీయతతో

కమ్మగ ముద్దలు గలిపిన

నమ్ముమదియె కడుపు నింపు నరుడా వినుమా!!

కళ్యాణ చక్రవర్తి

 

 

కనుమా యమ్మమ్మదిగో

తన మనుమల పైన ప్రేమ తనరుచు నుండన్

తినిపించె గోరు ముద్దలు

కనుటకు నయనములు వేయి కలిగిన మేలౌ

డా. బి. ద్వారకానాథ్

హుషారు నీ కళ్ళలో

ఆనందం నీ చెక్కిళ్లలో

చురుకుదనం నీ నడకలో

ఏమని వర్ణించను నీ అభినయాన్ని

నా కళ్ళలో మెరిసిన మెరుపువా

నా మనసున మురిసిన ముద్దబంతివా

అచ్చ తెలుగింటి ముగ్దవా

పరికిణిలో ఒదిగిన జాణవా

చెవికి జారిన బంగరు బుట్టల నడుగు

సెలయేటి మధ్య ఎగిరే గువ్వ నడుగు

చిందులు వేసే పదహారణాల పడుచు నడుగు

మోమున విసిరిన ఆనందానికి ఖరీదు ఎంతో

 

కోవూరి